ಅಜ್ಮಾನ್: ಸೌಹಾರ್ದ ಲಹರಿ (Souhardha Lahari) ಸಂಘಟನೆಯ ವತಿಯಿಂದ ‘ಸೌಹಾರ್ದ ಸ್ವರ ಸಂಗಮ’ ಎಂಬ ಶೀರ್ಷಿಕೆಯಡಿ ಸಂಗೀತ, ನೃತ್ಯ ಹಾಗೂ ಮನರಂಜನೆಯ ಸುಂದರ ಸಮ್ಮಿಲನ ಕಾರ್ಯಕ್ರಮವನ್ನು ಅಕ್ಟೋಬರ್ 24ರಂದು ಶನಿವಾರ ಅಜ್ಮಾನ್‌ನ ಅಲ್ ತಲ್ಲಾಹ್‌ನಲ್ಲಿರುವ ಹ್ಯಾಬಿಟಾಟ್ ಶಾಲೆಯಲ್ಲಿ ಆಯೋಜಿಸಲಾಗಿದೆ.
ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿ ದಿವಂಗತ ಯುವರಾಜ್ ಕೆ. ದೇವಾಡಿಗ ಅವರ ಸ್ಮರಣಾರ್ಥ ಆಯೋಜಿಸಲಾಗಿರುವ ಮಕ್ಕಳ ಗಾಯನ ಸ್ಪರ್ಧೆಯ ಅಂತಿಮ ಸುತ್ತು ನಡೆಯಲಿದೆ. ಮಕ್ಕಳ ಸಂಗೀತ ಪ್ರತಿಭೆಗಳನ್ನು ಗುರುತಿಸಿ, ಅವರಿಗೆ ಸೂಕ್ತ ವೇದಿಕೆ ಕಲ್ಪಿಸುವ ಉದ್ದೇಶದಿಂದ ಈ ಸ್ಪರ್ಧೆಯನ್ನು ಆಯೋಜಿಸಲಾಗಿದೆ.
ಅಂದು ಮಧ್ಯಾಹ್ನ 3 ಗಂಟೆಯಿಂದ ರಾತ್ರಿ 10 ಗಂಟೆಯವರೆಗೆ ನಡೆಯಲಿರುವ ಕಾರ್ಯಕ್ರಮದಲ್ಲಿ ಸಂಗೀತ ಮತ್ತು ಸಾಂಸ್ಕೃತಿಕ ಮನರಂಜನೆಯ ವಿವಿಧ ಕಾರ್ಯಕ್ರಮಗಳು ಪ್ರೇಕ್ಷಕರನ್ನು ರಂಜಿಸಲಿವೆ. ಕುಟುಂಬ ಸಮೇತರಾಗಿ ಭಾಗವಹಿಸಿ ಕಾರ್ಯಕ್ರಮದ ಸಂಭ್ರಮವನ್ನು ಆಸ್ವಾದಿಸುವಂತೆ ಸಂಘಟಕರು ಆಹ್ವಾನಿಸಿದ್ದಾರೆ. ಕಾರ್ಯಕ್ರಮಕ್ಕೆ ಪ್ರವೇಶ ಉಚಿತವಾಗಿದೆ.
ಮೂರು ದಶಕಗಳ ಗಲ್ಫ್ ನಾಡಿನ ಗಾಯನ ಸೇವೆಗೆ ಹರೀಶ್ ಶೆರಿಗಾರ್ ಅವರಿಗೆ ‘ಸಂಗೀತ ಸದನೆ ಗೌರವ ಸನ್ಮಾನ’
ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಗಳಲ್ಲೊಂದಾಗಿ, ಗಲ್ಫ್ ನಾಡಿನಲ್ಲಿ ಕಳೆದ ಮೂರು ದಶಕಗಳಿಂದ ತಮ್ಮ ಗಾಯನದ ಮೂಲಕ ಸಂಗೀತ ಪ್ರೇಮಿಗಳ ಮನಗೆದ್ದಿರುವ ಖ್ಯಾತ ಗಾಯಕ ಹರೀಶ್ ಶೆರಿಗಾರ್ ಅವರಿಗೆ ‘ಸಂಗೀತ ಸದನೆ ಗೌರವ ಸನ್ಮಾನ’ ಪ್ರದಾನ ಮಾಡಲಾಗುತ್ತದೆ.
ಸಂಗೀತದ ಮೇಲಿನ ಅಪಾರ ಆಸಕ್ತಿ, ಅದ್ಭುತ ಗಾಯನ ಪ್ರತಿಭೆ ಹಾಗೂ ತಮ್ಮ ಸುಮಧುರ ಕಂಠದ ಮೂಲಕ ಸಂಗೀತಾಸಕ್ತರ ಹೃದಯದಲ್ಲಿ ವಿಶೇಷ ಸ್ಥಾನ ಗಳಿಸಿರುವ ಹರೀಶ್ ಶೆರಿಗಾರ್ ಅವರ ಕಲಾಸೇವೆಯನ್ನು ಗುರುತಿಸಿ, ಸೌಹಾರ್ದ ಲಹರಿ ತಂಡವು ಗೌರವಪೂರ್ವಕವಾಗಿ ಈ ಸನ್ಮಾನವನ್ನು ನೀಡಲಿದೆ. ಮೂರು ದಶಕಗಳ ಸುದೀರ್ಘ ಸಂಗೀತ ಪಯಣದಲ್ಲಿ ಅವರು ಸಲ್ಲಿಸಿರುವ ಸೇವೆಯನ್ನು ಗೌರವಿಸುವ ಈ ಕಾರ್ಯಕ್ರಮವು ಸಂಗೀತ ಕ್ಷೇತ್ರದ ಸಾಧಕರಿಗೆ ಪ್ರೋತ್ಸಾಹ ನೀಡುವ ಮಹತ್ವದ ಪ್ರಯತ್ನವಾಗಿದೆ.
ತುಳುನಾಡಿನ ಜನಪದ ಕಲೆಯನ್ನು ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಪಸರಿಸಿದ ಗಿರೀಶ್ ನಾರಾಯಣ ಗಣೇಶಪುರ ಅವರಿಗೆ ‘ಸಾಂಸ್ಕೃತಿಕ ಸದನೆ’ ಗೌರವ ಸನ್ಮಾನ
ಅಜ್ಮಾನ್: ತುಳುನಾಡಿನ ಶ್ರೀಮಂತ ಜನಪದ ಕಲೆಯಾದ ಹುಲಿವೇಷವನ್ನು ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಪರಿಚಯಿಸಿ, ಜನಪದ ಸಂಸ್ಕೃತಿಯ ವೈಭವವನ್ನು ಜಾಗತಿಕ ಮಟ್ಟದಲ್ಲಿ ಪಸರಿಸುವಲ್ಲಿ ಮಹತ್ವದ ಕೊಡುಗೆ ನೀಡಿರುವ ಗಿರೀಶ್ ನಾರಾಯಣ ಗಣೇಶಪುರ ಅವರಿಗೆ ಸೌಹಾರ್ದ ಲಹರಿ ತಂಡದ ವತಿಯಿಂದ ‘ಸಾಂಸ್ಕೃತಿಕ ಸದನೆ’ ಗೌರವ ಸನ್ಮಾನ ಹಾಗೂ ಪ್ರಶಸ್ತಿ ಪ್ರದಾನ ಮಾಡಲಾಗುತ್ತದೆ.
ಹುಲಿವೇಷದ ಮೂಲಕ ತುಳುನಾಡಿನ ಸಾಂಸ್ಕೃತಿಕ ಪರಂಪರೆಯನ್ನು ವಿದೇಶಗಳಲ್ಲಿಯೂ ಪರಿಚಯಿಸಿ, ಜನಪದ ಕಲೆಯ ಮಹತ್ವವನ್ನು ಜಗತ್ತಿಗೆ ಸಾರುತ್ತಿರುವ ಗಿರೀಶ್ ನಾರಾಯಣ ಗಣೇಶಪುರ ಅವರು ಯಕ್ಷಗಾನ, ರಂಗಭೂಮಿ, ಚಿತ್ರಕಲೆ ಸೇರಿದಂತೆ ಹಲವು ಕಲಾ ಕ್ಷೇತ್ರಗಳಲ್ಲಿ ಅಪಾರ ಕೊಡುಗೆ ನೀಡಿದ್ದಾರೆ. ವಿವಿಧ ಕಲಾ ಪ್ರಕಾರಗಳ ಮೇಲಿನ ಅವರ ಆಸಕ್ತಿ, ಕಲಾಸೇವೆ ಹಾಗೂ ತುಳುನಾಡಿನ ಸಂಸ್ಕೃತಿಯನ್ನು ಉಳಿಸಿ ಬೆಳೆಸುವ ಪ್ರಯತ್ನಗಳನ್ನು ಗುರುತಿಸಿ ಸೌಹಾರ್ದ ಲಹರಿ ತಂಡವು ಗೌರವಪೂರ್ವಕವಾಗಿ ಈ ಸನ್ಮಾನವನ್ನು ನೀಡಲಿದೆ.
ಕಲೆ ಮತ್ತು ಸಂಸ್ಕೃತಿಯ ವಿವಿಧ ಆಯಾಮಗಳಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ ಅವರ ಸಾಧನೆಯು ಕಲಾಸಕ್ತರಿಗೆ ಹಾಗೂ ಯುವ ಪೀಳಿಗೆಯ ಕಲಾವಿದರಿಗೆ ಪ್ರೇರಣೆಯಾಗಿದ್ದು, ತುಳುನಾಡಿನ ಜನಪದ ಪರಂಪರೆಯ ಪ್ರಸಾರಕ್ಕೆ ಮಹತ್ವದ ಕೊಡುಗೆಯಾಗಿದೆ. ಸಾಂಸ್ಕೃತಿಕ ಕ್ಷೇತ್ರದ ಸಾಧಕರನ್ನು ಗುರುತಿಸಿ ಗೌರವಿಸುವ ಸೌಹಾರ್ದ ಲಹರಿಯ ಈ ಪ್ರಯತ್ನವು ಕಲಾವಿದರ ಸೇವೆಗೆ ಸಲ್ಲಿಸುವ ಗೌರವದ ಸಂಕೇತವಾಗಿದೆ.
ಗಣ್ಯರ ಉಪಸ್ಥಿತಿ
ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ರೊನಾಲ್ಡ್ ಮಾರ್ಟಿಸ್, ಡಾ. ಬಿ.ಆರ್. ಶೆಟ್ಟಿ, ಹರೀಶ್ ಶೆಣೈಗಾರ್ ಹಾಗೂ ರಮಾನಂದ ಕುಡ್ವ ಭಾಗವಹಿಸಲಿದ್ದಾರೆ.
ಅತಿಥಿಗಳಾಗಿ ಸರ್ವೋತ್ತಮ ಶೆಟ್ಟಿ, ಶಶಿಧರ ನಾಗರಾಜಪ್ಪ, ದಯಾ ಕಿರೋಡಿಯನ್, ದಿನೇಶ್ ದೇವಾಡಿಗ, ವಿಶ್ವನಾಥ್ ಶೆಟ್ಟಿ, ಶಶಿರೇಖಾ ಶ್ರೀಕಾಂತ್, ರಾಮಚಂದ್ರ ಹೆಗ್ಡೆ, ಸುದರ್ಶನ್ ಹೆಗ್ಡೆ ಹಾಗೂ ಡಾ. ಸೀಮಾ ಕಾಮತ್ ಉಪಸ್ಥಿತರಿರಲಿದ್ದಾರೆ.
ಸಾಂಸ್ಕೃತಿಕ ಪ್ರತಿಭೆಗಳಿಗೆ ಪ್ರೋತ್ಸಾಹ
ಸೌಹಾರ್ದ ಲಹರಿಯು ಸಂಗೀತ ಹಾಗೂ ಸಾಂಸ್ಕೃತಿಕ ಚಟುವಟಿಕೆಗಳ ಮೂಲಕ ಸಮುದಾಯದ ಪ್ರತಿಭೆಗಳಿಗೆ ಪ್ರೋತ್ಸಾಹ ನೀಡುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದೆ. ಮಕ್ಕಳಲ್ಲಿ ಅಡಗಿರುವ ಗಾಯನ ಪ್ರತಿಭೆಯನ್ನು ಗುರುತಿಸಿ, ಆತ್ಮವಿಶ್ವಾಸ ಬೆಳೆಸುವ ಜೊತೆಗೆ ಕಲಾಸಕ್ತರಿಗೆ ಉತ್ತಮ ವೇದಿಕೆ ಒದಗಿಸುವುದು ಇಂತಹ ಕಾರ್ಯಕ್ರಮಗಳ ಮುಖ್ಯ ಉದ್ದೇಶವಾಗಿದೆ.
ಕಾರ್ಯಕ್ರಮದ ಯಶಸ್ಸಿಗಾಗಿ ಸೌಹಾರ್ದ ಲಹರಿಯ ಅಧ್ಯಕ್ಷ ಕರುಣಾಕರ ಅಡ್ಯಾರ್, ಉಪಾಧ್ಯಕ್ಷ ಮಹೇಶ್ ಅತ್ತಾವರ, ಪ್ರಧಾನ ಕಾರ್ಯದರ್ಶಿ ಯಶ್ ಕರ್ಕೇರ, ಸಾಂಸ್ಕೃತಿಕ ಕಾರ್ಯದರ್ಶಿ ಅಶೋಕ್ ಅಂಚನ್, ಖಜಾಂಚಿ ಸುರೇಶ್ ಎನ್. ಶೆಟ್ಟಿ ಹಾಗೂ ಕ್ರೀಡಾ ಕಾರ್ಯದರ್ಶಿ ರಿಚರ್ಡ್ ಡಿಸೋಜ ಅವರನ್ನೊಳಗೊಂಡ ಕೋರ್ ಕಮಿಟಿ ಸದಸ್ಯರು ಸಿದ್ಧತೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ.
