ಬ್ರಿಟನ್ನ 42 ವರ್ಷದ ಟಾಮಿ ಲಿಂಚ್ ಎಂಬ ವ್ಯಕ್ತಿಗೆ ಒಂದು ಬೆಳಿಗ್ಗೆ ಎದ್ದಾಗ ತನ್ನ ದೇಹವನ್ನು ನೋಡಿ ಆತಂಕ ಶುರುವಾಗಿತ್ತು. ಆತನ ಚರ್ಮವೆಲ್ಲಾ ಸಂಪೂರ್ಣವಾಗಿ ನೀಲಿ ಬಣ್ಣಕ್ಕೆ ತಿರುಗಿತ್ತು.. ವಿಪರೀತ ಸುಸ್ತು ಮತ್ತು ದೇಹದ ಬಣ್ಣ ಬದಲಾಗಿದ್ದನ್ನು ಕಂಡು ಗಾಬರಿಗೊಂಡ ಆತ, ಯಾವುದೋ ದೊಡ್ಡ ಕಾಯಿಲೆ ಇರಬಹುದೆಂದು ಭಾವಿಸಿ ಕೂಡಲೇ ಸ್ನೇಹಿತನ ಸಹಾಯದಿಂದ ಆಸ್ಪತ್ರೆಗೆ ಹೋಗಿದ್ದಾನೆ.
ಟಾಮಿಯ ಸ್ಥಿತಿಯನ್ನು ಕಂಡ ಆಸ್ಪತ್ರೆಯ ವೈದ್ಯರು ಮತ್ತು ಸಿಬ್ಬಂದಿ ಕೂಡ ಒಂದು ಕ್ಷಣ ಬೆಚ್ಚಿಬಿದ್ದಿದ್ದಾರೆ. ದೇಹದ ಬಣ್ಣ ನೀಲಿಯಾಗಿದೆ ಎಂದರೆ ರಕ್ತದಲ್ಲಿ ಆಮ್ಲಜನಕದ ಕೊರತೆಯಿರಬಹುದು ಎಂದು ಶಂಕಿಸಿದ ವೈದ್ಯರು, ತಕ್ಷಣವೇ ಆತನಿಗೆ ಕೃತಕ ಉಸಿರಾಟದ ವ್ಯವಸ್ಥೆ ಮಾಡಲು ಮುಂದಾದರು. ಆದರೆ, ಪರೀಕ್ಷೆ ನಡೆಸುವಾಗ ಅಸಲಿ ವಿಷಯ ಬಯಲಾಗಿದೆ. ವೈದ್ಯರೊಬ್ಬರು ಟಾಮಿಯ ಕೈಯನ್ನು ಸ್ವಚ್ಛಗೊಳಿಸಲು ಸ್ಪಿರಿಟ್ ಹಚ್ಚಿದ ಹತ್ತಿಯಿಂದ ಒರೆಸಿದಾಗ, ಆ ಹತ್ತಿ ನೀಲಿ ಬಣ್ಣಕ್ಕೆ ತಿರುಗಿತು! ಅಂದರೆ, ಆ ಬಣ್ಣ ದೇಹದ ಒಳಗಿನಿಂದ ಬಂದಿದ್ದಲ್ಲ, ಹೊರಗಿನಿಂದ ಅಂಟಿಕೊAಡಿತ್ತು ಎಂಬುದು ವೈದ್ಯರಿಗೆ ಅರ್ಥವಾಯಿತು.
ಆಗಿದ್ದು ಏನಂದರೆ, ಟಾಮಿ ಇತ್ತೀಚೆಗಷ್ಟೇ ಹೊಸದಾಗಿ ದಟ್ಟ ನೀಲಿ ಬಣ್ಣದ ಬೆಡ್ಶೀಟ್ಗಳನ್ನು ಖರೀದಿಸಿದ್ದನು. ಅವುಗಳನ್ನು ತೊಳೆಯದೆಯೇ ಎರಡು ದಿನಗಳ ಕಾಲ ಅದರ ಮೇಲೆ ಮಲಗಿದ್ದರಿಂದ, ಆ ಬೆಡ್ಶೀಟ್ನ ಬಣ್ಣ ಸಂಪೂರ್ಣವಾಗಿ ಆತನ ದೇಹಕ್ಕೆ ಅಂಟಿಕೊAಡಿತ್ತು.
ತಾನು ನೋಡಲು ‘ಅವತಾರ್’ ಸಿನಿಮಾದ ಪಾತ್ರದಂತೆ ಕಾಣುತ್ತಿದ್ದೆ ಎಂದು ಟಾಮಿ ನಂತರ ನಗುತ್ತಾ ಹೇಳಿಕೊಂಡಿದ್ದಾನೆ. ವಿಷಯ ತಿಳಿಯುತ್ತಿದ್ದಂತೆಯೇ ಆಸ್ಪತ್ರೆಯ ಸಿಬ್ಬಂದಿಯೆಲ್ಲಾ ನಗೆಗಡಲಲ್ಲಿ ತೇಲಿದರು. ತುರ್ತು ಚಿಕಿತ್ಸಾ ಘಟಕದ ಒತ್ತಡದ ನಡುವೆ ಈ ಘಟನೆ ಎಲ್ಲರಿಗೂ ತುಸು ನೆಮ್ಮದಿ ಮತ್ತು ನಗು ತರಿಸಿತು.
ಆ ನೀಲಿ ಬಣ್ಣ ಅಷ್ಟು ಸುಲಭವಾಗಿ ಹೋಗಲಿಲ್ಲ. ವಾರಪೂರ್ತಿ ಪ್ರತಿದಿನ ಸ್ನಾನ ಮಾಡಿದ ನಂತರವೇ ಆ ಬಣ್ಣ ಮಸುಕಾಯಿತು. ಈ ಘಟನೆಯಿಂದ ಟಾಮಿ ಒಂದು ದೊಡ್ಡ ಪಾಠ ಕಲಿತಿದ್ದಾನೆ-ಹೊಸ ಬಟ್ಟೆ ಅಥವಾ ಬೆಡ್ಶೀಟ್ಗಳನ್ನು ಖರೀದಿಸಿದ ತಕ್ಷಣ ಬಳಸಬಾರದು, ಮೊದಲು ಅವುಗಳನ್ನು ಚೆನ್ನಾಗಿ ತೊಳೆಯಬೇಕು! ನಮ್ಮ ದೈನಂದಿನ ಜೀವನದಲ್ಲಿ ಸಣ್ಣ ನಿರ್ಲಕ್ಷ್ಯಗಳು ಎಂತಹ ದೊಡ್ಡ ಗೊಂದಲಕ್ಕೆ ಕಾರಣವಾಗಬಹುದು ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ.
